DC KAWAWA AWAHAKIKISHIA WANANCHI WA NYAKAHAMBA KEREGE NA MAPINGA KUANZA KUPATA MAJI SAFI IFIKAPO NOVEMBA, 2021

Posted on: November 24th, 2020

DC KAWAWA AWAHAKIKISHIA WANANCHI WA NYAKAHAMBA KEREGE NA MAPINGA KUANZA KUPATA MAJI SAFI IFIKAPO NOVEMBA, 2021.

Mkuu wa Wilaya ya Bagamoyo, Mhe.  Zainab Kawawa amewahakikishia wakazi wa Kitongoji cha Nyakahamba - Kerege na Vitongozi vya Kibosha, Kimere na Mingoi vya Kata ya Mapinga kuanza kupata huduma Bora za Maji safi ifikapo Mwezi Novemba 2021.

Mhe. Zainab akizungumza katika Mkutano na Wananchi wa Nyakahamba, katika mkutano uliofanyika katika Ofisi za Kitongoji hicho, Novemba 24, 2020, amesema kadhia ya ukosefu wa Maji katika Vitongoji hivyo vya kata ya Kerege na Mapinga itafika tamati hivi karibuni baada ya kukamilika kwa mradi mkubwa wa ujenzi wa busta pump stesheni na tanki la maji la Ujazo wa lita Milioni 05 linalojengwa katika eneo la Vikawe.

“Nitumie fursa hii kuwahakikishia Wananchi wa Kata ya Kerege na Mapinga kuwa shida ya maji itafika mwisho baada ya kukamilika kwa mradi wa ujenzi wa tanki kubwa la maji lenye ujazo wa lita Mil. 05, na usambaaji wa miundombinu ya mabomba katika makazi ya wananchi wa maeneo hayo, hivyo wawe na subira kwani utekelezaji wa mradi huo unaotekelezwa na DAWASA, unandelea kwa kasi na utakapokamilika kero ya ukosefu wa maji itabaki kuwa historia”. Amesema Mhe. Zainab.

Mhe. Zainab akiambatana na Kamati ya Ulinzi na usalama ya Wilaya, Watendaji wa mamlaka ya DAWASA na RUWASA Wilayani Bagamoyo, wamefanya ziara maalumu ya ukaguzi wa miradi ya maji inayotekelezawa na mamlaka hizo mbili katika Wilaya ya Bagamoyo, ambapo wameshuhudia Mradi wa Ujenzi wa tanki la maji lenye uwezo wa kupokea lita milioni 05 kwa siku likiwa katika hatua ya Msingi.

Aidha, Mhe. Zainab, amewapongeza DAWASA Mkoa wa Bagamoyo, kwa juhudi wanazofanya na kuwaagiza kuongeza kasi ili Mradi huo ukamilike kwa wakati sahihi na kuanza kutoa huduma kwa jamii, kwani mradi huo unatarajiwa kuwanufaisha wakazi takribani 12,000 katika maeneo hayo.

Kwa upande wake Meneja Dawasa Mkoa wa Bagamoyo Bi. Judith Singinika, amesema watahakikisha wanausimamia mradi huo vizuri ili ukamilike kwa wakati na katika viwango vinavyotakiwa.

Wakati huo huo, Mhe. Zainab ametembelea na kukagua miradi ya maji inayotekelezwa na RUWASA Wilayani Bagamoyo, katika Kata ya Yombo na Kata ya Makurunge.

Meneja wa Wakala wa Maji na Usafi wa Mazingira Vijijini – RUWASA Wilaya ya Bagamoyo, Mhandisi James Kionaumela amesema katika Kata ya Yombo Kitongoji cha Chombejuu wanatekeleza mradi wa upanuzi wa kisima chenye urefu wa Mita 100, chenye uwezo wa kuzalisha lita 7200 kwa saa, ujenzi wa tanki la kuhifadhia maji lenye ujazo wa lita 28,000, ujenzi wa wa kituo kimoja cha kutekea maji chenye koki 8 na ujenzi wa sehemu ya kunyweshea mifugo, mradi utakaowanufaisha takribani wakazi 500 wa eneo hilo.

Mhandisi James anaongeza kuwa, RUWASA katika Kitongoji cha Kuluwi, Kata ya Yombo, inatekeleza mradi wa ujenzi wa Tanki la maji la lita za ujazo 75,000 la mnara wa Mita 6, Ujenzi wa vituo vya kuchotea maji 06, uchimbaji na ulazaji wa bomba la urefu wa Kilomita 2.75, mradi utakaokamilika Mwezi Januari 2021 na unatarajiwa kuwanufaisha wakazi takribani 1623 wa eneo hilo.

Halikadhalika, Mhandisi James Kionaomela ameongeza kuwa RUWASA pia ipo katika utekelezaji wa mradi wa ujenzi wa tanki la ujazo wa lita 50,000 juu ya mnara wa Mita 12, Vituo 8 vya kuchotea maji, Uchimbaji, ulazaji na ufungaji wa mabomba umbali wa km 5.25 na uunganishaji wa maji kutoka bomba la maji DAWASA Chalinze, miradi inayoendelea kutekelezwa sasa katika Kitongoji cha Mtoni, Makurunge, mradi utakaowanufaisha takribani wakazi 1169 wa eneo hilo.

Mkuu wa Wilaya ya Bagamoyo, Mhe. Zainab Kawawa ametembelea muradi hiyo yote inayotekelezwa na RUWASA na DAWASA, katika Halmashauri ya Wilaya ya Bagamoyo, yenye lengo la kuongeza upatikanaji wa huduma ya maji katika maeneo husika.